Blog
In
other , shrjaka-mijavayr
Գյուղատնտեսությունը կարող է մեծ դեր ունենալ Հայաստանի տնտեսության զարգացման գործում
Posted on 4 Դեկտեմբերի, 2020
Գյուղատնտեսությունը մի ոլորտ է, որը հկարող է մեծ դեր ունենալ Հայաստանի տնտեսության զարգացման գործում, հատկապես` այդ պահին: Այս մասին դեկտեմբերի 2-ին Հայաստանի Ազգային Ժողովում Տնտեսական հարցերի մշտական խորհրդարանական հանձնաժողովի նախաձեռնած աշխատանքային քննարկման ժամանակ ասաց ՀՀ գյուղատնտեսական դաշինքի ներկայացուցիչ Արթուր Գյոկչյանը: Մասնավորապես, նա հիշեցրեց, որ իրենք արդեն քննարկել են գյուղատնտեսական համագործակցության զարգացումը, եւ հավաստիացրեց, որ այս հարցն այս պահին առավել քան արդիական է: «Օրենքն աշխատում է, բայց այն որեւէ բարենպաստ պայման չի ստեղծել գյուղատնտեսական համագործակցության զարգացման համար: Խնդիրներ կան ինչպես հարկային, այնպես էլ կազմակերպչական ոլորտում»,- պարզաբանեց Գյոկչյանը եւ խնդրեց այս հարցը վերադարձնել օրակարգ: Բարձրացվեց նաեւ ներդրումների եւ դրա հետ կապված մարտահրավերների հարցը: Մասնակիցներից մեկը հիշեցրեց, որ յուրաքանչյուր մարդ բախվում է շինարարության ոլորտում ներդրումներ կատարելու հետ կապված խնդիրներին, հատկապես` պետական գերատեսչությունների հետ աշխատելիս: Իր հերթին, հանձնաժողովի նախագահ, իշխող «Իմ քայլը» դաշինքի պատգամավոր Բաբկեն Թունյանը հավաստիացրեց, որ Ազգային ժողովում ինտենսիվ քննարկումներ են ընթանում եւ որ շուտով շինարարության ոլորտում մարդիկ զգալի տարբերություն կզգան: «Դուք դա կզգաք առավելագույնը մեկ ամսվա ընթացքում: Մենք լիովին բաց ենք, պատրաստ ենք ձեզ հետ օրինագծեր քննարկել ինչպես դրանց ընդունումից առաջ, այնպես էլ` հետո»,- շեշտեց պատգամավորը` վստահեցնելով, որ դրանք պարզապես քննարկումներ չեն լինելու եւ որ նրանք հետեւողական են լինելու բոլոր խնդիրների լուծման հարցում:
In
other , shrjaka-mijavayr
Շրջակա միջավայրի նախարարը հանդիպել է ՄԱԿ-ի արդյունաբերական զարգացման կազմակերպության հայաստանյան գրասենյակի ներկայացուցչին
Posted on 4 Դեկտեմբերի, 2020
Հանդիպմանը մասնակցել են նախարարի տեղակալ Ա.Մազմանյանը և շրջակա միջավայրի նախարարության միջազգային համագործակցության վարչության պետ Ռ.Գրիգորյանը։
ՄԱԿ-ի արդյունաբերական զարգացման կազմակերպությունն իր համագործակցությունը ՀՀ Կառավարության, մասնավորապես՝ ՀՀ էկոնոմիկայի և բնապահպանության նախարարությունների հետ սկսել է գրասենյակի հիմնումից շատ ավելի վաղ՝ տրամադրելով տեխնիկական աջակցություն տարբեր ոլորտներում, այդ թվում՝ վտանգավոր թափոնների կայուն կառավարման և առավել մաքուր արտադրությունների խթանման։
Հանդիպմանը քննարկվել են գրասենյակի և Շրջակա միջավայրի նախարարության համատեղ ծրագրերը։ Տիկին Սիմոնյանն իր գոհունակությունն է հայտնել համատեղ ծրագրերի ընթացքից և առկա արդյունքներից:Հայաստանը սահմանել է էներգիայի ընդհանուր սպառման մեջ արևային էներգիայի մասնաբաժինը մեծացնելու հավակնոտ նպատակ, մինչև 2025 թվականը հասնելու բնակչության կողմից սպառվող էներգիայի 26 տոկոսը վերականգնվող աղբյուրներից արտադրմանը։ ԵՓԾ շրջանակներում ՄԱԱԶԿ ձգտելու է աջակցել Հայաստանին՝ արդյունաբերության մեջ էներգաարդյունավետության գործելակարգերի և վերականգնվող էներգիայի օգտագործմանը, հատկապես ՓՄՁ-ների կողմից, դրանց մրցունակությունը խթանելու և օրգանական հանածո վառելիքից կախվածությունը կրճատելու համար, քանի որ ջերմոցային գազերի արտանետումների ամենամեծ աղբյուրներից մեկը արդյունաբերությունն է։ Կարողությունների հզորացման միջոցառումները ճանապարհ կբացեն «ավելի կանաչ» գործելակարգերի առաջընթացի և հմտությունների զարգացման համար՝ ապագայում դեպի շրջանաձև տնտեսությանն անցնելու նպատակով։
Նախարար Ռոմանոս Պետրոսյանը ընդգծել է, որ հետպատերազմական այս փուլում միջազգային գործընկերների և դոնոր կազմակերպությունների հետ համագործակցության մեջ առավել կարևորում է այն հանգամանքը, որ բոլոր քայլերը համապատասխանեն հետպատերազմական իրականությանը և իրենց արդյունքներով միտված լինեն Հայաստանում հետպատերազմյան իրավիճակի մեղմմանը։
Նախարարն իր պատրաստակամությունն ու վճռականությունն է հայտնել օր առաջ ձեռնամուխ լինելու նախկինում նախանշված և արդեն ընթացիկ ծրագրերի իրականացմանը, օր առաջ ավելի լավ շրջակա միջավայր ունենալուն։
In
other , eco-aprelakerp , eco-dizayn
Hugo Boss-ի նոր հավաքածուն՝ կոստյումներ էկոլոգիապես մաքուր նյութերից
Posted on 4 Դեկտեմբերի, 2020
Hugo Boss-ի նոր հավաքածուում կան կոստյումներ, որոնք լիովին պատրաստված են էկոլոգիապես մաքուր նյութերից: Ամեն բան զարդարել է PETA կազմակերպության լոգոտիպը, որը պաշտպանում է կենդանիների իրավունքները։ «Hugo Boss-ն առաջին աշխարհահռչակ պրեմիում ապրանքանիշն է, որը սկսել է տղամարդկանց հագուստ արտադրել cruelty-free տեխնոլոգիայով», — նորաձեւության տան հետ համագործակցությունը մեկնաբանել է PETA-ի ներկայացուցիչ Հարոլդ Ուլմանը։ Ավելի վաղ տղամարդկանց կոստյումները պատրաստված էին մետաքսից, բրդից եւ այլ կենդանական նյութերից: Hugo Boss-ի նոր կոստյումները հասանելի են բեժ, մուգ կապույտ եւ սեւ գույնի ապրանքանիշի կայքում: PETA-ի Vegan լոգոտիպին արժանացած նորաձեւ բրենդների ցանկում են նաեւ Topshop եւ Esprit ընկերությունները։
In
other , shrjaka-mijavayr
Էկոլոգիական իրավիճակը ծնում է անոմալ երևույթներ
Posted on 4 Դեկտեմբերի, 2020
Ինչպես տեղեկացնում է life.ru-ն ` Ղազախստանի Տեմիրտաու քաղաքի բնակիչները ոչ հաճելի երևույթի ականատես են դարձել. սև ձյուն է տեղացել: Քաղաքացիները սոցցանցում կիսվում են փողոցները պատած մուգ գույնի ձյան լուսանկարներով: Տեղացիների խոսքով՝ նման արտասովոր երևույթի պատճառը տարածաշրջանում տիրող էկոլոգիական իրավիճակն է: 2018-ին տեղի բնակիչները ստուգումներ են անցկացրել քաղաքում գտնվող մետաղագործական գործարանում: Ստուգումը բացահայտել է, որ ձեռնարկությունում գերազանցվել է արտանետումների թույլատրելի սահմանը: Երկրի էկոլոգիայի հարցերով նախարարը հայտարարել է, որ Տեմիրտաուի գործարաններում կրկին ստուգումներ կիրականացվեն:
In
other , eco-snund , eco-dexatun
Էկո հանրագիտարան. Կոճապղպեղ
Posted on 3 Դեկտեմբերի, 2020
Կոճապղպեղը (իմբիր) անչափ օգտակար մթերք է, այն իր մեջ պարունակում է հազարավոր օգտակար տարրեր: Սակայն հաճախ հարց է ծագում, թե ո՞ւմ է հակացուցված կոճապղպեղն ու ո՞ր դեպքերում: Կոճապղպեղի մասին բազմիցս խոսել ենք մեր նախկին հրապարակումներում: Այն հրաշալի կերպով հանգստացնում է նյարդերը, առավոտյան սրտխառնոցը, գլխացավերը և մարսողական խնդիրները: Բացի այդ, այս հրաշք համեմունքը պայքարում է բորբոքումների, տաքության, արյունատար անոթների խնդիրների և արթրիտի դեմ, պաշտպանում է լյարդն ու սրտանոթային համակարգը, վերացնում է ավելորդ միկրոբներն ու վիրուսները: Գիտնականները պարզել են նաև, որ կոճապղպեղն օգտակար է գրեթե բոլորին, սակայն կա մարդկանց խումբ, ում կտրականապես արգելված է օգտագործել կոճապղպեղը: Այդ խմբին են պատկանում մարդիկ, ովքեր խնդիրներ ունեն արյան հետ: Կոճապղպեղը խթանում և արագացնում է արյան հոսքը, սակայն այն մարդիկ, ովքեր խնդիրներ ունեն արյան հետ, պետք է հեռու մնան այս համեմունքից, քանի որ այն միայն կբարդացնի վիճակը: Քաշի հետ խնդիրներ ունեցող մարդկանց Որքան էլ տարօրինակ հնչի, սակայն այս անգամ ոչ թե խոսելու ենք ավելորդ քաշ ունեցող մարդկանց մասին, այլ՝ հակառակը, քաշի պակաս ունեցողների մասին: Բոլորն էլ գիտեն, որ կոճապղպեղն օգնում է ազատվել ավելորդ կիլոգրամներից, արագացնում է նյութափոխանակությունը: Այդ իսկ պատճառով այս համեմունքն արգելված է բոլոր նրանց, ովքեր ցանկանում են քաշ հավաքել: Դեղամիջոցներ օգտագործողներին Շատերը պնդում են, որ կոճապղպեղը չի կարելի խառնել դեղամիջոցների հետ, քանի որ այն կարող է չեզոքացնել դեղամիջոցի ազդեցությունը: Չափազանց վտանգավոր է օգտագործել հակակոագուլյանտների, ինսուլինային դեղամիջոցների հետ: Հղիներին Կոճապղպեղը բնական հզոր խթանիչ է, որը կարող է վնասել հղիության ընթացքը: Այդ իսկ պատճառով, անհրաժեշտ է հեռու մնալ այս համեմունքից հղիության ընթացքում:
In
other , shrjaka-mijavayr
Շրջակա միջավայրին հասցվել է ավելի քան 12 միլիոն դրամի վնաս
Posted on 3 Դեկտեմբերի, 2020
ՀՀ բնապահպանության և ընդերքի տեսչական մարմնի կողմից 2020թ. նոյեմբերի 16-20-ն ընկած ժամանակահատվածում իրականացված ստուգումների, շրջայցերի, վարչական վարույթի գործերի քննության ընթացքում արձանագրված 9 դեպքով հաշվարկվել է 12 միլիոն 317 հազար 500 դրամի չափով շրջակա միջավայրին հասցված վնաս։ Նախկինում արձանագրված 3 դեպքով հաշվարկվել է 100 հազար դրամի չափով շրջակա միջավայրին հասցված վնաս, նշանակվել է 200 հազար դրամի չափով վարչական տուգանք։ Դեպքերը վերաբերում են բուսական աշխարհի պահպանության ոլորտին: Նշված ժամանակահատվածում ՀՀ Արդարադատության նախարարության Հարկադիր կատարումն ապահովող ծառայություն է ուղարկվել 5 գործ (815 հազար դրամի չափով վարչական տուգանք)։ ՀՀ պետական բյուջե մուտքագրվել է 1 միլիոն 954 հազար 880 դրամ:
In
eco-aprelakerp , eco-kosmetika
5 պատճառ հաճախակի եւ շատ տաք ջրով լոգանք չընդունելու համար
Posted on 3 Դեկտեմբերի, 2020
Ըստ բժիշկների՝ հաճախակի տաք լոգանք ընդունելը կարող է վտանգավոր լինել: Երկար ժամանակ ցնցուղի տակ կանգնել կամ լոգանք ընդունել ցանկացող մարդիկ շատ սխալներ են գործում, ինչը կարող է ազդել առողջության վրա:
Երկարատեւ գործընթաց
Շատ հաճախ նաեւ երկարատեւ լոգանքը կարող է վնաս հասցնել մաշկին, այսինքն խանգարվում է մաշկի բնական միկրոֆլորան, քանի որ ջրի ազդեցության տակ մաշկի վրայից հեռանում են օգտակար մանրէները, որոնք մաշկը պաշտպանում են ինֆեկցիաներից: Երկարատեւ լոգանքը, եթե այն բավականին տաք ջրով է, հեռացնում է մաշկի յուղային մասը, ինչն ապահովում է փափկությունը եւ պաշտպանությունը, հետեւաբար հաճախակի լողանալը կարող է հանգեցնել մաշկի չորության, դյուրագրգռության, երբեմն մաշկի վրա առաջանում են էկզեմաներ:
Անհրաժեշտ է ցնցուղի տակ անցկացնել 20 րոպե, լոգանք կարելի է ընդունել 40 րոպե: Լոգանքից հետո անհրաժեշտ է օգտագործել փափկացնող քսուքներ, ավելին, դա պետք է անել անմիջապես, քանի դեռ ծակոտիները բաց են եւ կարող են ընդունել կոսմետիկ միջոցները:
Վտանգավոր օճառ
Շատ մարդիկ լողանալու ընթացքում օգտագործում են օճառ կամ հիգիենայի այլ միջոցներ: Բժիշկներն ասում են, որ անհրաժեշտ է նվազագույնի հասցնել դրանց օգտագործումը կամ առհասարակ բացառել: Հատկապես վտանգավոր են համարվում հակաբորբոքային միջոցները կամ լոգանքի գելերը՝ կապված այն հանգամանքի հետ, որ տարբեր մաքրող միջոցները խախտում են մաշկի բնական իմունիտետը, ինչը պատճառ է դառնում կորյակների եւ էկզեմայի առաջացման: Փոշու եւ կեղտի հետ շփումը, նույնիսկ եթե աչքի համար տեսանելի չեն, որոնք մաշկի համար պատվաստման դեր են կատարում, թույլ է տալիս օրգանիզմին տարբերակել օգտակար մանրէները հիվանդածիններից: Եթե նման շփումը խախտվում է, միկրոֆլորայի պաշտպանական գործառույթի հետ կապված խնդիրներ են առաջանում: Իսկ հակաբակտերիալ օճառը պարունակում է տարրեր, որոնք ոչնչացնում են ոչ միայն պաթոգեն մանրէները, այլ նաեւ օգտակարները, ինչի արդյունքում առաջանում է անհավասարակշռություն: Այդ ամենը հանգեցնում է մաշկի չորացման, վերքերի եւ ինֆեկցիաների առաջացման:
Մի շարք մաշկաբաններ համոզված են, որ լոգանքի ժամանակ հատուկ մաքրող միջոցներ օգտագործելու կարիք չկա, նույնիսկ եթե դուք դուրս եք եկել մարզադահլիճից եւ շատ քրտնած եք:
Վնասակար խնամք
Դեմքի խնամքի համար շատերն օգտագործում են հատուկ միջոցներ հակաբակտերիալ ազդեցությամբ: Համարվում է, որ մաշկը պաշտպանված է պզուկներից եւ ցանից: Իրականում հաստատված է, որ նման նյութերի հաճախակի օգտագործումն օգուտ չի տալիս, դրանք չորացնում են մաշկը, միեւնույն ժամանակ դեմքի մաքրությունը տեւում է ընդամենը 20 րոպե:
Անիմաստ մաքրող միջոց
Լոգանքի ժամանակ սպունգն օգտագործում են, որպեսզի մարմնի վրայից հեռացնեն մաշկի «մահացած» մասերը: Միեւնույն ժամանակ դրանք բոլորը մնում են սպունգի մեջ, եւ ջերմության ու խոնավության պայմաններում առաջանում են սնկեր եւ բակտերիաներ: Այնուհետեւ դրանք տարածվում են մաշկի վրա:
Այն դեպքում, երբ առանց սպունգի հնարավոր չէ, անհրաժեշտ է այն հաճախակի փոխել՝ ամսվա մեջ երկու անգամ: Մասնագետները խորհուրդ են տալիս դրանք լվանալ եւ չոր տեղում պահել:
Բարձր ջերմաստիճան
Այն հարցը, թե ինչպիսի ջրով է անհրաժեշտ լողանալ, մինչեւ հիմա քննարկվում է: Ոմանք վստահ են, որ օգտակար է տաք ջուրը, ոմանք էլ՝ սառը: Ըստ էության, ոչ մեկն էլ ճիշտ չեն: Ջուրը պետք է գոլ լինի, միայն այդ դեպքում մարմինը կարող է հարմարվել ջրին: Սառը լոգանքի դեպքում այն մարդու մոտ, ով սովոր չէ լողանալ սառը ջրով, անոթները պարզապես չեն դիմանա, կտրուկ կսեղմվեն, իսկ արյան մեջ մեծ քանակությամբ ադրենալին կառաջանա: Դա կարող է առաջացնել սրտամկանի ինֆարկտ կամ գլխուղեղի կաթված:
Հատուկ ուշադրություն կարելի է դարձնել ջրի ջերմաստիճանին գլուխը լվանալու ժամանակ: Շատերը գլուխը տաք ջրով են լվանում: Դա կտրականապես չի կարելի, բարձր ջերմաստիճանն ակտիվացնում է յուղոտ գեղձերը, եւ մազերն ավելի շուտ են կեղտոտվում: Մազերի համար անհրաժեշտ է օգտագործել սենյակային ջերմաստիճանի ջուր:
In
other , shrjaka-mijavayr
Հայաստանում հայտնաբերվել է գիտությանը մինչ այժմ անհայտ միջատի տեսակ
Posted on 3 Դեկտեմբերի, 2020
Վայրի բնության և մշակութային արժեքների պահպանման հիմնադրամի (FPWC) կողմից մշտապես կարևորվել է ՀՀ-ում գիտության զարգացման բոլոր հնարավորությունների օգտագործումը։ Այսօր առավել ակնհայտ է դարձել Հայաստանում գիտության զարգացման կարևորությունը և գնահատելի է այդ ուղղությամբ իրականացվող ցանկացած գործողություն։ Դեռևս 2020թ. գարնանը FPWC-ն հյուընկալել է Գերմանիայի Էկոհամակարգերի հետազոտությունների ինստիտուտի (Institute for Ecosystem Research, Deutschland) մի խումբ գիտնականների, որոնք իրականացրել են տարածքում առկա միջատների բազմազանության ուսումնասիրություն: Գիտնականների հետաքրքրության շրջանակը եղել է անողնաշար կենդանիների բազմազանությունը, մասնավորապես՝ ցեցերը, թիթեռները և այլ միջատներ, որոնք հանդիպում են Կովկասյան կենսաբազմազանության ապաստարանի (CWR) տարածքում: [gallery link="file" ids="2654,2655,2656"] Դաշտային աշխատանքների արդյունքում գիտնականները հայտնաբերել են միջատի տեսակ, որը մինչ այժմ անհայտ է եղել գիտությանը ոչ միայն Հայաստանի, այլև՝ ամբողջ աշխարհի մակարդակով: Վերջերս հրապարակվել է նաև այս արժեքավոր գտածոյի վերաբերյալ գիտական հոդված, որտեղ հեղինակները մանրամասնորեն նկարագրել են իրենց փորձն ու կատարած աշխատանքը: Սկզբնապես նմուշի պահպանման վիճակը ցույց է տվել, որ այն հիմնականում համապատասխանում է D. kondarella-ի և D. gaalhaszlerae-ի արտաքին տեսքին, սակայն օրգանների հետագա դիֆերենցիալ ախտորոշումը, ինչպես նաև՝ ԴՆԹ-ի շտրիխ կոդավորումը ցույց է տվել, որ տեսակը գիտությանը դեռևս անհայտ նմուշ է: 2020թ․-ի մայիս ամսին գիտնականներ Հ. Ռովեկի և Ն. Սավենկովի կողմից Արարատի մարզի Ուրցաձորի շրջանից հավաքվել է միջատի մեկ էգ առանձնյակ: Միջատն անվանակոչվել է Ուրցաձոր գյուղի պատվին՝ ստանալով Depressaria urtsadzorensis անունը: Հիշեցնենք, որ գյուղի հարակից տարածքը ճանաչված է որպես Թիթեռների ապրելավայրի կարևորագույն գոտի (Prime Butterfly Area)։
In
other , eco-snund , eco-dexatun
Էկո հանրագիտարան. Ավելուկ
Posted on 2 Դեկտեմբերի, 2020
Ավելուկը կամ թրթնջուկը պատկանում է Polygonaceae – հնդկացորենազգիների ընտանիքին, մինչեւ 150 սմ բարձրությամբ բազմամյա խոտաբույս է։ Բույսի ցողունը ուղղաձիգ է, ծաղիկները` կանաչավուն, մանր, կազմում են խիտ ողկույզներ, ծաղկում է ապրիլ-մայիս ամիսներին, պտուղը եռանիստ ընկուզիկ է, հասունանում է սեպտեմբերին։
Աճում է խոնավ վայրերում, գետերի եւ լճերի մոտակայքում, ճանապարհների եզրերին։ Տարածված է երկրագնդի բարեխառն գոտիներում` որպես մոլախոտ։ Հայաստանում հանդիպում են ավելուկ գանգուրը (Crispus), ճնճղուկի (Acetosella), սովորական (Acetosa) տեսակները։ Առաջինի տերեւները գանգրավոր են, ծաղկափթթությունները երկսերմ են, դարչնագույն, փայլուն։ Մեկ բույսը տալիս է մինչեւ 5000 սերմնապտուղ` 7 գրամ ընդհանուր քաշով։ Սա երկամյա բույս է, մինչեւ 30 սմ-ի հասնող առանցքային արմատով, ունի տերեւային վարդակ։
Երրորդ եւ հաջորդ տարիներին վերաճ է տալիս։ Ճնճղուկի ավելուկն ունի լավ զարգացած արմատային համակարգ։ Աշնանը ծլած բույսը նույն տարում առաջացնում է տերեւային վարդակ, իսկ գարնանը` ցողունները։ Ցողունը թույլ ճյուղավորված է, տերեւները նիզակաձեւ են, կոթունավոր, ծաղկափթթությունը` ցանցառ, կանաչ հուրան է։ Սերմը փայլուն, եռակող, դարչնագույն պտուղ է։ Տարածված է Հայաստանի բարձրլեռնային եւ անտառատափաստանային գոտիներում` որպես մոլախոտ։ Բուժիչ նպատակներով օգտագործվում են գանգրավոր թրթնջուկի արմատները եւ կոճղարմատը, որոնց մեջ պարունակվում են դաբաղանյութ, ֆլավոններ, վիտամին K, ասկորբինաթթու, եթերային յուղեր, խեժեր, երկաթ, օրգանական թթուներ, թրթնջկաթթվային կալցիում (9 տոկոս), այլ` բույսին հատուկ նյութեր։ Արմատի եփուկները կիրառվում են աղիքային ինֆեկցիաների դեպքում։ Իսկ ժողովրդական բժշկության մեջ` որպես արյունարգել միջոց եւ մաշկային հիվանդությունների դեպքում։
Բույսի արմատներն օգտագործում են կաշեգործության մեջ, նաեւ` որպես սեւ ներկանյութ։ Հակացուցված է հղիներին եւ երիկամների հիվանդություններ ունեցողներին։
Ավելուկի արմատները (2ճ/գ) լցրեք արծնապատ կաթսայի մեջ, ավելացրեք 200 մլ եռջուր, ծածկեք եւ տաքացրեք 30 րոպե մարմանդ կրակի վրա (ջրային բաղնիք)։ Հովանալուց հետո թրմեք, հումքը մզեք։ Ստացված լուծույթի ծավալը հասցրեք 200 մլ-ի, ավելացնելով եռջուր։ Թուրմը պահեք սառնարանում մինչեւ երկու օր։
Թրթնջուկ սովորական. Ունի առանցքային հզոր փնջարմատ։ Նետասրտաձեւ, թթվահամ տերեւները կազմում են վարդակ։ Վերնամասում (մինչեւ 90 սմ) տերեւները կիպ գրկում են ցողունը։ Ծաղկակիր ցողունը սկսվում է տերեւածոցերից։ Ունի հուրանաձեւ վարդագույն ծաղկափթթություն։ Թրթնջուկը արժեքավոր է որպես վաղահաս բանջարային մշակաբույս։ Ընդ որում, պահանջկոտ չէ հողի նկատմամբ, ստվերադիմացկուն եւ ցրտադիմացկուն է։ Տերեւները պահպանում են որակը մինչեւ 7 աստիճան C-ի դեպքում։
Եթե թրթնջուկը ցանեք վաղ գարնանը, ապա ամռան ընթացքում կարելի է 2 անգամ բերք հավաքել, իսկ հաջորդ տարին` 3 անգամ։
Այսրկովկասում հնագույն ժամանակներից գիտեին թրթնջուկի արմատների թուրմի` լուծողական, հակաճիճվային ազդեցության մասին, օգտագործել են տերեւները եւ եփուկը լուծի դեմ։ (30 գ) թրթնջուկի եփուկը (200 մլ ջրում) խմում են օրական 3-5 ճ/գ, կամ 50 գ քաղցր ջրին ավելացնում են 1-2 թ/գ թրթնջուկի հյութ եւ խմում են որպես լեղամուղ միջոց։ Բացի այդ, տերեւների եփուկը (1լ ջրին` 50 գ հումք) օգտագործում են որպես արյունարգել միջոց։ Պետք է խմել օրը 3-4 անգամ` 50-70 գրամ, ուտելուց առաջ։
Թրթնջուկի տերեւները պարունակում են հանքային աղեր, կաթնաթթու, խնձորաթթու, թրթնջկաթթու (360 մգ` 100 գրամի մեջ), ասկորբինաթթու (80 մգ), կարոտին (8 մգ), կվերցետին (0,5 մգ), վիտամիններ B1, B2, P, K, PP։ Թրթնջուկը երկարատեւ եւ մեծաքանակ օգտագործելու դեպքում, հնարավոր է, առաջացնի աղային փոխանակման խախտում եւ երիկամների հիվանդություններ։ Սննդի մեջ պետք է օգտագործել թրթնջուկի մատղաշ տերեւները, որոնք կարելի է նաեւ չորացնել։
Խորհուրդ է տրվում թրթնջուկն օգտագործել կաթնամթերքի հետ։ Թրթնջուկի կալորիականությունը շատ ցածր է, այն պարունակում է մեծ քանակությամբ սպիտակուց, բջջանյութ, օսլա, ֆերմենտներ, եթերային յուղ, այլ օգտակար նյութեր։ Տերեւների պատրաստուկները զարմանալիորեն լավացնում են ախորժակը եւ կարգավորում մարսողության գործընթացը։ Վիտամին C-ով հարուստ տերեւներում պարունակվող դաբաղանյութերը անփոխարինելի միջոց են բկաբորբի, լնդերի բորբոքման դեպքում։ Հնուց հայտնի են թրթնջուկի մանրէասպան, հակաբորբոքային, վերքամոքիչ հատկությունները, այդ պատճառով` դրա տերեւները կամ հյութը օգտագործում են վերքերի եւ որոշ մաշկային հիվանդությունների բուժման համար։ Կարոտինի պարունակությամբ չի զիջում սպանախին, իսկ վիտամին C-ի պարունակությամբ գերազանցում է փշոտ եւ կարմիր հաղարջենուն։ Բույսի հիման վրա պատրաստում են նաեւ դեղատներում վաճառվող միջոցներ, որոնք խորհուրդ են տրվում ավիտամինոզի, աթերոսկլերոզի, հիպերտոնիայի, ալերգիայի դեպքում։ Թրթնջուկն ունի վատ խոլեստերինը օրգանիզմից հեռացնելու հատկություն, այն բարձրացնում է դիմադրողականությունը։
Արյունը մաքրող` խոտաբույսերից պատրաստված թեյ
Խառնեք 1-ական ճ/գ հազարատերեւուկի, եղինջի, եզան լեզվի, թրթնջուկի խոտերը։ Այս խառնուրդի 1ճ/գ վրա լցրեք 200 մլ եռջուր, թրմեք ողջ գիշեր։ Առավոտյան քամեք։ Խմեք օրվա ընթացքում։ Ընդունեք 10 օր, ընդմիջեք 1 շաբաթ եւ նորից կրկնեք։
Քամեք թրթնջուկի հյութը, խառնեք այն հավասար քանակությամբ կանաչ սոխի հյութի հետ, 1ճ/գ խառնուրդին ավելացրեք 1թ/գ մեղր, խմեք օրը 2-3 անգամ։ Բարձրացնում է հեմոգլոբինի մակարդակը։
Մանրացրեք եւ չորացրեք թրթնջուկի արմատը, փոշիացրեք։ Օգտագործեք օրը 2 անգամ կեսական գրամ, որպես համեմունք։
Այտուցի դեպքում
Թրթնջուկի մանրացրած 100 գրամ արմատները 5 րոպե եփեք ջրային բաղնիքի վրա, 300 մլ եռջրի մեջ, 1 ժամից քամեք։ Խմեք օրը 2 անգամ, մեկական ճ/գ։ Օգնում է նաեւ թիկունքի մկանային ցավերին։
Աղ դրած թրթնջուկ
Լվացած եւ եփած տերեւները տրորեք քամիչի վրա, վրան աղ ցանեք, լցրեք ապակե տարայի մեջ, փակեք եւ պահեք հով նկուղում։ 100 գրամ թրթնջուկին պահանջվում է 25 գրամ աղ։
Ինչպես սառեցնել թրթնջուկը ձմռան համար. Անհրաժեշտ է թրթնջուկի տերեւները լավ լվանալ, շատ լավ չորացնել, որպեսզի սառեցման պրոցեսի ժամանակ հեշտ ձեւով հնարավոր լինի առանձնացնել մեկը մյուսից։ Դասավորեք տերեւները պոլիէթիլենային փաթեթի մեջ եւ դրեք սառցախցիկը (սառնարանի)։
Շաքարախտի համար
Եփեք 500 գրամ սպանախը, քամեք։ Տապակեք յուղի մեջ 100 գրամ մաղադանոսի արմատներ։ Մանր կտրատեք 200 գրամ թրթնջուկ։ Խառնեք այս բոլորը եւ եփեք եռջրի կամ արգանակի մեջ։ Մատուցեք թթվասերով։
Գեղարարություն
Ճարպոտ մազերի համար. Աղացեք 1 միջինից փոքր վարունգ, 4-5 թրթնջուկի տերեւներ։ Խառնեք 1ճ/գ թթված կաթ (կամ ցածր յուղայնությամբ յոգուրտ)։ Քսեք մազերին, ներմերսեք մազարմատներին։ Փաթաթեք գլուխը պոլիէթիլենային թաղանթով, պահեք 20 րոպե եւ լվացեք տաք ջրով։
Վիտամինային դիմակ. Մանր կտրատեք թրթնջուկի մի քանի տերեւներ, ճզմեք փայտե գդալով։ Քսեք դեմքին, 15-20 րոպեից հեռացրեք անձեռոցիկի օգնությամբ եւ շփեք դեմքը թթված կաթով։
Պիգմենտային բծերի դեպքում. Հավանգով տրորեք (մանրացրած) մեկական ճ/գ թրթնջուկի, սեւ հաղարջենու, արոսի տերեւները, ավելացրեք 1թ/գ մանանեխի փոշի եւ 1 ճ/գ ջուր։ Խառնեք շիլան, քսեք պիգմենտային բծերի վրա, պահեք 15 րոպե, լվացեք գոլ ջրով։
Համեղ է եւ օգտակար
Լվացած, քամած, կտրատած տերեւները (500 գրամ) խաշեք 2-3 ճ/գ կարագի, 30-40 գրամ կանաչ սոխի հետ։ Վրան լցրեք հարած ձու եւ քերած բրինձ-պանիր։ Եփեք մինչեւ զանգվածը պնդանա։
In
other , shrjaka-mijavayr
Ապօրինի ծառահատումներ Հայաստանի տարածքում
Posted on 2 Դեկտեմբերի, 2020
