ՀՀ ԱՆ «Ֆիզիկական բժշկության և կուրորտաբանության» գիտահետազոտական ինստիտուտի բժիշկ–դիետոլոգ Վարդանուշ Պետրոսյանը խոսել է այն մասին, թե ինչպես պետք է ճիշտ սնվել ձմռանն ու բարձրացնել օրգանիզմի իմունիտետը։
«Գաղտնիք չէ, որ ճիշտ սննդակարգն օգնում է հարմարվել սեզոնին։ Սառը եղանակին ցանկալի է, որպեսզի սնունդը լինի տաք և յուղոտ», – նշեց Պետրոսյանը։
Նրա խոսքով, սնունդը, որը հիմա հայերն օգտագործում են ձմռանը, շատ է տարբերվում մեր նախնիների օգտագործած սնունդից։
«Ձմռանը հարկավոր է օգտագործել բուսական սնունդ, ձավարեղենից պատրաստված շիլաներ, բանջարեղեն, միրգ, հատապտուղ, օրինակ` դդում, նուռ, չիչխան։ Այս մթերքներն իրենց մեջ պահպանում են արևի ջերմությունը, և դրանց օգտագործումն օգնում է ձմռանը լրացնել արևի պակասը», – ասաց Պետրոսյանը։
Նա նաև նշեց, որ ձմռանը հարկավոր է օգտագործել շատ համեմունքներ։
«Կարելի է օգտագործել չոր կանաչեղեն, դրանով փոխարինել աղն ու պղպեղը։ Ցանկալի է օգտագործել կոճապղպեղ և քրքում, որոնք ունեն հիանալի տաքացնող հատկություն, դրանք նաև արդյունավետ հակաօքսիդանտներ են», – ընդգծեց Պետրոսյանն ու հավելեց, որ ձմեռային կերակուրը պետք է նաև պարգևի բարձր տրամադրություն։
«Ձմռանը վատ տրամադրությունը հաճախ ստիպում է մեզ ուտել շատ քաղցրավենիք, ինչը սխալ է։ Քաղցրը մեր օրգանիզմի վրա ազդում է թմրամիջոցի նման։ Երբ դրա ազդեցությունն անցնում է, վատ տրամադրությունը սրվում է», – նշեց Պետրոսյանը։
Նա նաև խորհուրդ տվեց ավելի շատ ժամանակ անցկացնել հաճելի և լավ մարդկանց հետ, իսկ ազատ երեկոներն ու տոները` ընտանիքի շրջապատում։
«Ձմռանը պետք է օգտագործել ավելի շատ կաթնամթերք, մասնավորապես, մածուն, որը բարելավում է աղիների միկրոֆլորան։ Այն նաև օգնում է բարձրացնել իմունիտետն ու պաշտպանում է շնչառական հիվանդություններից», – ավելացրեց Պետրոսյանը։
Նրա խոսքով, ձմռանն իմունիտետն օգնում է բարձրացնել նաև թթուն։
«Սակայն հարկավոր է հիշել, որ թթուն կարող է վնասակար լինել ճնշման հետ խնդիր ունեցողների համար։ Ձմռանն օգտակար է օգտագործել դդմի աղացած սերմեր, քանի որ դրանք ցինկի հիանալի աղբյուր են, որն իր հերթին բարձրացնում է իմունիտետը», – ասաց Պետրոսյանը։
Նա ևս մեկ անգամ հիշեցրեց չիչխանի օգտակար հատկությունների մասին, որը հզոր հակաօքսիդանտ է։
«Օրական մեկ թեյի գդալ չիչխանի յուղը կօգնի ամրապնդել իմունիտետը», – ընդգծեց դիետոլոգը։
Թողնել մեկնաբանություն