Երևանի քաղաքապետարանի և ՄԱԿ-ի Զարգացման ծրագրի հայաստանյան գրասենյակի համատեղ նախագիծի արդյունքում Երևանն այսօր արտաքին լուսավորության ցանցում 50-70% խնայողություն է ապահովում: Մութն ընկնելուն պես մայրաքաղաքը լուսավորում է շուրջ 70 հազար լապտեր: Միայն վերջին երեք տարում իրականացված համատեղ ծրագրի շրջանակում շուրջ 6000 նատրիումային լամպ է փոխարինվել էներգախնայող LED լուսատուներով: Եվս 4000-ի փոխարինումը նախատեսվում է այս տարվա ծրագրով:
«Այս տարվա ծրագրով ձեռք ենք բերել 500 մլն դրամի լուսատու, վճարել ենք 250-ը: Հաջորդ տարի նախատեսում ենք նույն ծավալի փոխարինում իրականացնել Երևանում»,- ասում է Երևանի քաղաքապետ Հրաչյա Սարգսյանը և հավելում, որ Էներգախնայող LED լուսատուներով են կահավորվում երկրորդական փողոցներն ու բակային տարածքները, լուսավորվում՝ երբևէ արտաքին լուսավորության համակարգ չունեցող փողոցները:
«Այս ծրագրերի շրջանակում 2023թ. արդեն Երևանի արտաքին լուսավորության մոտ 50%-ը փոխարինված կլինի էներգախնայող և ժամանակակից լուսատուներով: Վերջնական նպատակը նա է, որ մենք կարողանանք մեր եղած բյուջեի շրջանակում երկարացնել լուսավորության ժամերը: Այս պահի դրությամբ մենք ունենք երկու ռեժիմ՝ ձմեռային և ամառային: Ձմեռային ռեժիմի դեպքում 24:00-ին են անջատվում լույսերը, իսկ ամառայինին՝ ժամը 01:00-ին: Իհարկե, փողոցներ ունենք, որտեղ մինչև լուսաբաց լուսավորությունը կա»,- ընդգծում է քաղաքապետը:
Թողնել մեկնաբանություն