Փետրվարի 13-15-ը Մարզահամերգային համալիրում Հայաստանում առաջին անգամ տեղի կունենա աննախադեպ ինտերակտիվ ցուցադրություն՝ համեմված նորաձեւության էլեմենտներով:
«Ցուցադրությունը կոչվում է H2O – ջուր, քանի որ ջուրը կյանքի խորհրդանիշ է, իսկ մեր կյանքն առանց ջրի պատկերացնելն ուղղակի անհնար է: Ցուցադրությունը լինելու է ինտերակտիվ, լուսային եւ ձայնային ձևավորմամբ՝ հագուստի ցուցադրության ձեւով»,- Eco.am-ի հետ զրույցում ասաց Ցուցադրության հեղինակ Kivera Naynomis հանրահայտ բրենդի հեղինակ Արեւիկ Սիմոնյանն ու հավելում որ այն իր մասշտաբայնությամբ ու մատուցման ձևով տարբերվելու է մինչ այս եղած բոլոր ցուցադրություններից։
Ըստ բրենդի հեղինակի մինչ այս եղած ցուցադրություններից այն տարբերվելու է նրանով, որ լինելու է առանց մոդելների, հագուստները ներկայացվելու են հետաքրքիր տարբերակով, իսկ թե ինչպես, դիզայները չի բացում փակագծերը։
«Կարծում եմ՝ առավել հետաքրքիր կլինի, երբ մարդիկ այդ ամենն անձամբ տեսնեն: Միայն մեկ գաղտնիք կասեմ՝ լինելու է տարբեր խորագրերով 8 սրահ, ու դրանցում ցուցադրված հագուստներն ունենալու են իրենց պատմությունները։ Սրահ մտնելուց այցելուի համար պարզ է լինելու, թե որ սրահում է գտնվում։ Օրինակ, կլինի սրահ, որտեղ ցուցադրված հագուստների վրա կգտնեք մեր եկեղեցիների զարդանախշերից, հատկապես այն եկեղեցիների, որ կորցրել ենք հենց այս պատերազմի ժամանակ… Օրն էլ պատահական ընտրված չէ. Տյառընդառաջն է՝ քրիստոնյա աշխարհի համար շատ կարեւոր օր»,- ընդգծեց դիզայները:
Արեւիկի մոտ նման ցուցադրության մտահղացումն առաջացել է հետպատերազմյան ժամանակահատվածում․ «Մենք կորցրել ենք մեր մշակութային կոթողները, եկեղեցիները, արցախյան եդեմական հողերը: Մտածում էի, ինչպես կարող եմ աշխարհին ցույց տալ մեր բազամադարյա մշակույթը: Գուցե ձեր համար զարմանալի լինի, թե ինչպես կարող ենք նորաձեւության միջոցով մեր ձայնը լսելի դարձել: Բայց հավատացեք, ու ես հավատում եմ դրան, որ եթե ամեն մեկս մեր գործով պայքարենք, ինչ-որ մի բան կարող ենք փոխել: Ես կարող էի միայն մշակույթով ու իմ գործով պայքարել»:
Ցուցադրության նախապատրաստական աշխատանքները սկսվել են նախորդ տարվա օգոստոսին. «Մտքումս միայն մի գաղափար կար՝ աշխարհին պետք ցույց տալ, որ այդ կոթողները, եկեղեցիները, մշակութային օջախները հայկական են: Եվ համոզված եղեք, որ ցուցահանդեսի ժամանակ շատ բան կտեսնեն այցելուները»:
Արեւիկն ասում է, որ իր համար շատ կարեւոր մի բան, որ հանդիսատեսը ցուցադրությունից դուրս գալիս, ոչ թե միայն ասի՝ «ի՜նչ հետաքրքիր ցուցադրություն էր», այլ իր հետ տանի ինքն իրեն վերանայելու, արժեւորելու ու գնահատելու մեր ունեցածը։
«Մենք աշխարհին կարող ենք ներկայանալ մեր մշակույթով, մենք ունենք այդ ներուժը՝ գեղեցիկը տեսնելու ու տարածելու։ Պարզապես այն պետք է ներկայացվի ճիշտ եւ հասցեական։ Իսկ հատկապես այս վերջին իրադարձություններից հետո, հասկացանք, որ սկզբունքներ, արժեքներ, պահպանելու ու այն կորցնելու վտանգի առաջ ենք կանգնած։ Գուցե ես չորս տղաների մայր եմ, դրա համա՞ր եմ այդպես մտածում: Բայց՝ ոչ, կարծում եմ, որ սա համամարդկային ցավ է ու կապ չունի այստեղ, թե քո երեխաները ի՞նչ սեռ են ու ի՞նչ ազգի։ Ու մենք կանք եւ պետք է մնանք ճիշտ քրիստոնյա»,- եզրափակեց Արևիկ Սիմոնյանը։
Թողնել մեկնաբանություն