Էկոկրթական խաղ-միջոցառում՝ Բնության պետական թանգարանում

https://eco.am/%d5%a7%d5%af%d5%b8%d5%af%d6%80%d5%a9%d5%a1%d5%af%d5%a1%d5%b6-%d5%ad%d5%a1%d5%b2-%d5%b4%d5%ab%d5%bb%d5%b8%d6%81%d5%a1%d5%bc%d5%b8%d6%82%d5%b4%d5%9d-%d5%a2%d5%b6%d5%b8%d6%82%d5%a9%d5%b5%d5%a1%d5%b6/

Օրերս Հայաստանի բնության պետական թանգարանում ՀՀ շրջակա միջավայրի նախարարությունը կազմակերպել էր բնապահպանական խաղերի միջոցառում։ Խաղ-ներկայացման նպատակն էր, բնապահպանական խնդիրների լուծման գործընթացում մասնակից 8-15 տարեկան երեխաների իրազեկվածությունն ու ներգրավվածությունը բարձրացնելը։ Ինչպես նաև՝ հանրահռչակել հասարակական տարբեր կազմակերպությունների և անհատների կողմից մշակված և ստեղծված բնապահպանական խաղերը, և խոսել դրանց մասին, որպես շրջակա միջավայրի ոլորտում առկա խնդիրների լուծման ևս մեկ ճանապարհ։

Նախքան միջոցառման օրակարգային հատվածին անցնելը, ելույթներով հանդես են եկել թանգարանի տնօրենը և նախարարության ներկայացուցիչները, ովքեր ողջունելով միջոցառման մասնակիցներին, ևս մեկ անգամ անդրադարձել են հանրապետությունում էկոլոգիական կրթության և բնապահպանական գիտելիքների մակարդակի բարձրացման հիմնախնդիրներին և ներկայացրել նախարարության կողմից այդ համատեքստում տարվող աշխատանքները։

Միջոցառման ընթացքում ներկայացվել են մի շարք բնապահպանական խաղեր։

«Այ Էս Էս Դի» Համայնքների կայուն զարգացման նորարարական լուծումներ» հասարակական կազմակերպության նախագահ-համահիմնադիր Մխիթար Ավետիսյանը և կազմակերպության անդամ Քրիստինե Աթայանը ներկայացրել են «Բնությունամանիա» խաղը։

Այս խաղը նպատակ ունի փոքրերի և մեծերի շրջանում տարածել ավելի կանաչ ապրելակերպ և հնարավորություն տալ ծանոթանալու Հայաստանում և աշխարհում առկա բնապահպանական խնդիրներին և դրանց լուծումներին։

Հայաստանից COP 27-ին մասնակցած երկու երիտասարդ պատվիրակներ Նարեկ Օհանյանը և Երազիկ Հովհեյանը ներկայացրել են «Կլիմապոլիս» սեղանի խաղը, որի միջոցով մասնակիցներն  իրազեկվում են կլիմայի փոփոխության հետևանքների մեղմման հնարավորություններին:

Շրջակա միջավայրի նախարարության իրավախորհրդատու Մարի Չաքրյանը ներկայացրել է Գերմանիայի միջազգային համագործակցության ընկերության (GIZ) կողմից գործընկեր նախարարությունների հետ համատեղ իրականցվող ECOserve ծրագրի շրջանակում «Հանրային իրազեկման և մոնիտորինգի կենտրոն» ՀԿ մշակած «Էներգապոլիա» բնապահպանական, կրթական սեղանի խաղը, որի նպատակն է մասնակիցներին սովորեցնել ճիշտ կառավարել բնական ռեսուրսները և դրսևորել էներգախնայող վարք։

«Շրջակա միջավայր և առողջություն» հասարակական կազմակերպության տնօրեն Լիաննա Մարգարյանը  ներկայացրել է «ԷկոՇուտ-Հասիկ» խաղը, որն օգնում է  երիտասարդներին իմանալ բնապահպանական խնդիների մասին և ձեռնարկել քայլեր՝ պահպանելու Երկիր մոլորակը։

Միջոցառումն ավարտվել է Շրջակա միջավայրի նախարարության «Օզոնային շերտի պահպանություն» ծրագրի ներկայացուցիչների կողմից կազմակերպված ինտերակտիվ խաղ-վիկտորինայով, որի ընթացքում խաղի առավել ակտիվ մասնակիցներին կազմակերպությունների կողմից նվիրվել են ներկայացված խաղերի օրինակներ։

Միջոցառման մասնակից երեխաների համար նաև շրջայց է կազմակերպվել Բնության թանգարանում։

Թողնել մեկնաբանություն

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով